<>முட்டைக்கோஸ் சூப் <>

முட்டைக்கோஸ் சூப் 

தேவையான பொருட்கள்
முட்டைக்கோஸ் - 250 கிராம்
வெண்ணெய் - 2 டேபிள்ஸ்பூன்
கேரட் - 1
தண்ணீர் - 1 லிட்டர்
பால் - 100 மி.லி
எலுமிச்சம் பழச்சாறு - 1 டீஸ்பூன்
கொத்தமல்லி - சிறிது
உப்பு, மிளகுத்தூள் - தேவைக்கேற்ற அளவு
செய்முறை
முட்டைக்கோஸை நறுக்கிக் கொள்ளவும். கேரட்டின் தோலை சீவி, அதனையும் நறுக்கிக் கொள்ளவும். இக்காய்கறிகளை வெண்ணெயில் வதக்கி தண்ணீர் சேர்த்து பிரஷர் குக்கரில் வேக வைத்துக் கொள்ளவும். காய்கறிகள் நன்கு வெந்ததும் தேவையான உப்பு, மிளகுத்தூள் ஆகியவற்றைச் சேர்க்கவும். எலுமிச்சம் பழச் சாற்றையும் சேர்த்து 10 நிமிடம் கொதிக்க வைக்கவும். பின்பு அதில் பால், கொத்தமல்லி சேர்த்து சூடாகப் பரிமாறவும்.


முட்டைக்கோஸ் சூப் – எடை குறைக்க உதவும் திட்ட, பத்திய உணவு...உபயோகமான தகவல்கள்
யார் முதலில் முட்டைக்கோஸ் சூஃப் உணவைத் துவங்கி வைத்தார்கள் என்பது தெரியவில்லை. இது குறைந்த அளவு கலோரிகள் கொண்ட கொண்ட உணவு. 7 நாட்களுக்கு மட்டுமே இந்த உணவுப் பட்டியிலின் படிச் சாப்பிட வேண்டும். இந்த 7 நாட்களில் தேவையான அளவு முட்டைக்கோஸ் சூஃப்பைத் தினமும் குடிக்கலாம், பழங்கள், காய்கறிகள், மற்ற உணவுகளையும் சாப்பிடலாம்.

7 நாட்களுக்கான உணவு விவரங்கள்:-

• நாள் 1 – உங்கள் விருப்பம் போல் எவ்வளவு சூஃப் வேண்டுமானாலும், எத்தனை தடவையும் சாப்பிடலாம். வாழைப்பழத்தைத் தவிர மற்ற எல்லாப் பழங்களையும் சாப்பிடலாம்.

• நாள் 2 – முட்டைக்கோஸ் சூஃப், புதிய, பசுமையான சமைக்காத அல்லது சமைத்த காய்கறிகள். காய்ந்த பீன்ஸ், பட்டாணி, கிழங்குகள் (உருளைக்கிழங்கைத் தவிர) மற்றும் மக்காச் சோளத்தையும் சாப்பிடாதீர்கள். ஒன்று அல்லது இரண்டு அவித்த உருளைக்கிழங்குகளையும் சாப்பிடலாம்.

• நாள் 3 – வேண்டிய அளவு முட்டைக்கோஸ் சூஃப், பழங்களும் காய்கறிகளும் நாள் 1, நாள் 2 போல். ஆனால் உருழைக்கிழங்குகளைச் சாப்பிடக்கூடாது.

• நாள் 4 – தேவையான அளவு முட்டைக்கோஸ் சூஃப், 6 முதல் 8 வாழைப்பழங்கள் மற்றும் கொழுப்பில்லாத பால்.

• நாள் 5 – 300 முதல் 500 கி கொழுப்பில்லாத இறைச்சி (சைவ உணவு சாப்பிடுபவர்களுக்குப் பருப்பு வகைகள்) மற்றும் 6 தக்காளிகள் வரை. இன்று ஒரு தடவையாவது முட்டைக்கோஸ் சூஃப் சாப்பிடுங்கள். இறைச்சி சாப்பிட விருப்பம் இல்லாவிட்டால் அவித்த மீன் அல்லது தோல் இல்லாத கோழிக்கறி சாப்பிடலாம். 3 முதல் 4 லிட்டர் தண்ணீர் குடிங்கள்.

• நாள் 6 – கொழுப்பில்லாத இறைச்சி அல்லது பருப்புக்கள் மற்றும் காய்கறிகளை இன்று சாப்பிடலாம். ஃஸ்டீக்ஸ், 2 அல்லது 3 துண்டுகள் மற்றும் புதிய, பசுமையான காய்கறிகளால் தயாரிக்கப்பட்ட சலாட். ஒரு தடவையாது முட்டைக்கோஸ் சூஃப் சாப்பிடுங்கள். உருழைக்கிழங்கு, மற்ற கிழங்குகளை இன்று சாப்பிடக்கூடாது.

• நாள் 7 – சோறு, புதிய, பசுமையான காய்கறிகள் மற்றும் சீனி சேர்க்கப்படாத பழச்சாறுகள் இன்று சிபாரிசு செய்யப்படுகின்றன. ஒரு தடைவையாது முட்டைக்கோஸ் சூஃப் சாப்பிடுங்கள்.

இந்த 7 நாட்களிலும் பால், சீனி சேர்க்கப்படாத தேநீர், காப்பி, குருதி நெல்லிச் சாறு மற்றும் தண்ணீரையும் குடிக்கலாம்.

மதுபானங்கள் மற்றும் எல்லா மென்பானங்களையும் குடிக்ககூடாது. சோடாவையும் தவிர்க்கவேண்டும்.

உங்கள் ருசிக்குத் தகுந்த மாதிரி முட்டைக்கோஸ் சூஃப்பைத் தயாரிங்கள். முட்டைக்கோஸ், வெங்காயம், தக்காளி, பச்சை மிளகு, சிவரிக்கீரை (செலரி) மற்றும் கொஞ்சம் வெங்காய சூஃப் கலவையையும் சேர்த்துக்கொள்ளலாம். கறிப்பொடி, மிளகாய், மிளகு மற்ற மசாலாப்பொருட்களையும் அளவோடு சேர்த்துக் கொள்ளலாம். உப்பு அதிகம் சேர்க்காதீர்கள்.

முட்டைக்கோஸ் சூஃப்பின் ருசி சிலருக்குப் பிடிக்காது. வாயுத்தொல்லைகள் உண்டாகலாம். இந்த உணவில் தேவையான புரதம், கொழுப்பு, மற்ற பொருட்களும் குறைவாக இருக்கச் சந்தர்ப்பம் உண்டு.

முட்டைக்கோஸ் சூஃப் உணவு மிக விரைவில் எடையைக் குறைக்க நல்லது. தொடர்ந்து இதைச் சாப்பிடக்கூடாது. 7 நாட்களுக்குப் பிறகு உங்கள் உடம்பிற்குத் தகுந்த, தொடர்ந்து சாப்பிடக்கூடிய உணவும், தேவையான உடற்பயிற்சிகளும் சிபாரிசு செய்யப் படவேண்டும்.

முட்டைக்கோஸ் சூஃப் உணவைக் கடைப்பிடிக்க நீங்கள் ஆரோக்கியமுள்ளவராகவும் மன பலம் கொண்டவராகவும் இருக்க வேண்டும். தலைச்சுற்றல் வந்தால் உடனே மருத்துவரிடம் செல்லுங்கள். இதனால் எடை குறைவதால், தொடர்ந்து மற்ற உணவுகளைக் கொண்டு இன்னும் குறைக்க ஆர்வம் உண்டாகும்.

இந்த முறையால் எடையைக் குறைப்பது மட்டுமல்லாமல் நீங்கள் விரும்பும் எடையையும் எப்பொழுதும் வைத்திருக்க முடியும்.